सञ्चार क्लब नेपालको भवन निर्माण प्रारम्भ ।

उर्लाबारी / पूर्वोत्तर मोरङका सञ्चारकर्मी हरूको साझा संस्था सञ्चार क्लब नेपाल, उर्लाबारीको आफ्नै भवन निर्माण कार्य औपचारिक रूपमा सुरु भएको छ। क्लबका संस्थापक अध्यक्ष दुर्गा प्रसाद खतिवडाले बुधबार एक विशेष समारोहका बीच भवनको शिलान्यास गर्नुभयो ।

उर्लाबारी–६ मा निर्माणाधीन बसपार्कको उत्तरतर्फ रहेको ६ कठ्ठा जग्गामा उक्त भवन निर्माण सुरु गरिएको हो । उर्लाबारीका समाजसेवी अमृत तामाङ, ज्ञानु बास्कोटा र जंगबहादुर कार्कीले क्लबलाई उक्त जग्गा निःशुल्क उपलब्ध गराएका हुन ।

भवन निर्माणका लागि चालु आर्थिक वर्षमा कोशी प्रदेश सरकारअन्तर्गत भौतिक पूर्वाधार विकास मन्त्रालयबाट १० लाख रुपैयाँ र सामाजिक विकास मन्त्रालयबाट ७ लाख रुपैयाँ बजेट विनियोजन भएको छ। क्लबका वर्तमान अध्यक्ष कुमार खड्काका अनुसार, यस वर्षदेखि निर्माण कार्यको औपचारिक सुरुआत भईसकेको छ भने, थप आवश्यक बजेटका लागि संघ, प्रदेश तथा स्थानीय सरकारसँग समन्वय भइरहेको छ।

झण्डै साढे ४ करोड रुपैयाँ लागतमा सम्पन्न हुने उक्त भवन आधुनिक पूर्वाधारयुक्त तीन तले संरचना हुनेछ, जसमा सञ्चारकर्मीहरूको बैठक, तालिम, गोष्ठी र सेमिनारका लागि आवश्यक सबै सुविधा रहने सेमिनार हलसमेत समावेश गरिनेछ।