सुनसरी । सुनसरीमा ट्याक्टरको ठक्करबाट मोटरसाइकलमा सवार दुई युवाको ज्यान गएको छ। सोमबार सुनसरीको भोक्राहा नरसिंह गाउँपालिका–३ स्थित फूलचोकमा ट्याक्टर र मोटरसाइकल आपसमा ठोक्किँदा उक्त घटना भएको हो।
प्रदेश १–०२–००३ त ९०२ नम्बरको ट्याक्टरले प्रदेश १–०२–०५५ प ६२९६ नम्बरको मोटरसाइकललाई ठक्कर दिँदा मोटरसाइकलमा सवार इनरुवा नगरपालिका–१० का २० वर्षीय सर्फराज अन्सारी र हरिनगर गाउँपालिका–१ का २१ वर्षीय महजित अन्सारीको ज्यान गएको जिल्ला प्रहरी कार्यालय सुनसरीले जनाएको छ।
गम्भीर घाइते भएका दुबैलाई तत्काल उपचारका लागि सप्तकोशी न्यूरो अस्पताल, सुनसरी लगिएको थियो तर उपचारको क्रममा दुबैको मृत्यु भएको हो।
दुर्घटनामा इनरुवा १० जाल्पापुरका साहेब अन्सारी पनि घाइते भएका छन्। हाल घाइतेको अवस्था र मोटरसाइकल चालक को थिए भन्नेबारेमा अनुसन्धान जारी रहेको प्रहरीले जनाएको छ।
दुर्घटनापछि आक्रोशित स्थानीयबासीले पूर्व–पश्चिम राजमार्ग केही समयका लागि अवरुद्ध पारेका थिए। तर, बाक्लो प्रहरीको उपस्थिति र प्रयासपछि भीड तितरबितर पार्दै सडक सुचारु गरिएको सुनसरी प्रहरीले जनाएको छ।
यस दुर्घटनासँग सम्बन्धित ट्याक्टर चालक, भोक्राहा नरसिंह–३ का ४६ वर्षीय सुब्दीराम चमारलाई प्रहरीले नियन्त्रणमा लिएर थप अनुसन्धान अघि बढाएको छ।
प्रतिक्रिया
सम्बन्धित खवर
