“आफ्नो गाउँ, आफ्नै हातबाट”—यही भावनासहित उर्लाबारी–९ बोर्डरलाइनका बासिन्दाले आइतबार बिहान बाटो सरसफाइ अभियान चलाए। गाउँलाई सफा, सुन्दर र हराभरा बनाउने लक्ष्यका साथ गरिएको श्रमदानमा वडा अध्यक्ष नरबहादुर मोक्तान, वडा सदस्य गणेश किम्दाङ राई, गाउँ टोल अध्यक्ष राजन रायमाझी लगायत स्थानीयवासीको उत्साहपूर्ण सहभागिता रह्यो।

अभियानको क्रममा धुलोमुक्त सडक, फोहोर संकलन र वरिपरिका झाडी सफा गरियो। स्थानीयको प्रयासलाई थप ताजगी दिन स्वर्गीय रामकुमार सेरेङको सम्झनामा उनकी श्रीमती शान्ता सेरेङले पानी र चिसो पेय (कोक) सहयोग गरिन्।

वडा अध्यक्ष मोक्तानले भने, “गाउँको सफाइ केवल सौन्दर्यका लागि होइन, स्वास्थ्य र एकताको लागि पनि हो। जब हामी सबै मिल्छौं, सानो पहलले पनि ठूलो परिवर्तन ल्याउन सक्छ।”

गाउँ टोल अध्यक्ष रायमाझीले भने, “आजको अभियान केवल सरसफाइ मात्र होइन, हाम्रो भविष्यका लागि लगानी हो। हामी यसलाई निरन्तरता दिनेछौं।”

वडा सदस्य गणेश किम्दाङ राईले भने, “सफा र व्यवस्थित गाउँ हाम्रो पहिचान हो। सबैको सानो योगदानले ठूलो उपलब्धि सम्भव हुन्छ भन्ने प्रमाण आजको दिनले दिएको छ।”

शान्ता सेरेङले भावुक हुँदै भनिन्, “यो सहयोग मेरा दिवंगत श्रीमान्को सम्झनामा गरेको हुँ। उहाँले जहिल्यै गाउँको सेवा गर्नुपर्छ भन्ने सोच राख्नुहुन्थ्यो। त्यो सोचलाई म पनि यस्ता अभियानमा साथ दिँदै जाँदैछु।”

स्थानीयको उत्साह र एकताले गर्दा यो अभियानलाई अब नियमित रूपमा अघि बढाउने प्रतिबद्धता गरिएको छ।